හිස කෙස් සැකසීමට යාමේදී ගල්වන ලද ආලේපනයක් හේතුවෙන් කාන්තාවකගේ හිස කෙස් ගැලවී යාමේ සිද්ධියට සම්බන්ධයෙන් විමර්ශනවලට පොලිස් මූලස්ථානයේ සහකාර පොලිස් අධිකාරිවරයකු ලෙස හදුන්වන අයෙකු දුරකතන ඇමතුම් ලබාදෙමින් දැඩි බලපෑම් සිදුකරන බව මිනුවන්ගොඩ පොලීසිය ඊයේ (18)දින මිනුවන්ගොඩ මහේස්ත්‍රාත් අධිකරණයට වාර්තා කළේය.
තමන් සහකාර පොලිස් අධිකාරිවරයෙකු ලෙස හඳුන්වන මෙම පුද්ගලයා විසින් දුරකථන ඇමතුම් කීපයක්ම ලබාදෙමින් මිනුවන්ගොඩ පොලීසියේ නිලධාරීන්ට ප්‍රශ්නගත රූපලාවණ්‍යාගාරයේ සිදුවීම හා එහි හිමිකාර කාන්තාව පිළිබඳව සිදුකරන පොලිස් විමර්ශන සිදු නොකරන ලෙසට බලපෑම් කරන බව පොලිසිය එහිදී අධිකරණයට දැන්වීය .
මෙතෙක් එම හිමිකාරිනිය පොලීසිය මගින් අත්අඩංගුවට ගෙන නැති අතර ඇය පළාගොස් සැඟව සිටී.
මෙම අවස්ථාවේදී පොලිසිය විසින් ඉදිරිපත් කළ කරුණු සැලකිල්ලට ගත් මිනුවන්ගොඩ මහේස්ත්‍රාත් ටී .තේනබදු මහත්මිය මෙම දුරකථන ඇමතුම් පිළිබඳ වාර්තාවක් ලබාගෙන අධිකරණයට කරුණු වාර්තා කරන ලෙස නියෝග කළේය .
