සිය බිරිඳට අයත් මිරිහානේ පිහිටි නිවසේ රථ ගාලේ තිබී සොයාගත් අංක තහඩු නොමැති සැකකටයුතු මෝටර් රථය ගැන තමාත් බිරිඳත් කිසිවක් නොදන්නා බව හිටපු රාජ්‍ය අමාත්‍ය ලොහාන් රත්වත්තේ මහතා පොලිස් ප්‍රශ්න කිරීම් හමුවේ පවසා ඇත.
මිරිහාන පොලීසියට ලද තොරතුරකට අනුව මිරිහාන ශාලව පාරේ පිහිටි ලොහාන් රත්වත්තේ මහතාගේ බිරිඳට අයත් නිවසේ රථ ගාලේ තිබී අංක තහඩු නොමැති සැකකටයුතු මෝටර් රථයක් සොයා ගනු ලබන්න්නේ ඊයේ ය.
ලොහාන් රත්වත්තේ මහතා මිරිහාන පොලීසියට පවසා ඇත්තේ තමාගේ හිටපු සම්බන්ධීකරණ ලේකම්වරයා විසින් තමාටද නොදන්වා මෙම මෝටර් රථය මෙහි ගෙනවිත් දමා ඇති බවය. මෙම මෝටර් රථය කාට අයත් එකක් දැයි තමා නොදන්නා බවද රත්වත්තේ මහතා කීය.
මෝටර් රථය සිය බිරිඳගේ නිවසට ගෙනවිත් දැමුවේ යැයි රත්වත්තේ මහතා පවසන්නේ පසුගිය දා රත්වත්තේ මහතාට අයත් කාර්යාලයක් තුළදී වෙඩි තබාගෙන සියදිවි හානිකර ලේකම්වරයා ගැනය.
මෙම වාහනගේ අගුල් දමා ඇති බැවින් සහ එහි යතුර සොයා ගැනීමට නොමැති නිසා අධිකරණයට කරුණු වාර්තාකර අගුල් කඩා වාහනය සෝදිසි කිරීමට පියවර ගන්නා බව උසස් පොලිස් නිලධාරියෙක් පැවසීය.
මෙම මෝටර් රථයට ලොහාන් රත්වත්තේ හෝ ඔහුගේ බිරිඳ හෝ වෙනත් පාර්ශවයක් මෙතෙක් හිමිකම් නොකියන බැවින් වාහනය ආපදා රථ රැගෙන යන වාහනයක පටවා පොලිස් ස්ථානය වෙත රැගෙන ගොස් තිබේ.
