fbpx
තවත්
    මුල් පිටුව බ්ලොග්

    ජොර්ජ් ෆ්ලොයිඩ්ගේ ඝාතනයෙන් ඇරඹි ඇමරිකාවේ කලු සුදු කැරැල්ල

    ඇත්ත වශයෙන්ම අමෙරිකාවේ ජාති භේද වාදය හිස ඔසවා ඇද්ද?මෙය දීර්ඝ කාලයක් තිස්සේ අමෙරිකාව මුහුන දෙන බලවත් අභියෝගයක්ද? අප්‍රිකානු අමෙරිකානුවන්(African American ) යනුවෙන් හදුන්වන්නේ කවුරුන්ද? කලු ජාතිකයන් අමෙරිකාව විසින් කුනු බක්කියට දමා තිබේද ? මෙහි කලු ජාතිකයන්ට රජයේ සමාජයේ හෝ පුද්ගලික ආයතන වල ඉහලටම යාමට ඉඩ ලබාදී නැද්ද? අමෙරිකාවේ පාතාල කල්ලි මෙහෙය වන්නේ ,මත් ද්‍රව්‍ය ජාවාරම් සිදු කරන්නේ බොහෝ අපරාධ වල නිරත වන්නේ, රැකියා නොකර රජයෙන් වැඩි වැඩියෙන් ආධාර මුදල් හා සහනාධාර ලබා ගන්නේ සොරකම් වලට ස්ත්‍රි දූශන වලට මුල් තැන දෙන්නේ මේ කලු ජාතිකයන්ද? මෙම ලිපිය මාර්ගයෙන් ඉහත සදහන් ප්‍රශ්න වලින් ප්‍රශ්න කීපයකට හෝ වසර 38ක මගේ අමෙරිකා අත් දැකීම් අනුසාරයෙන් ගවේෂණාත්මකව පිලිතුරු ඉදිරිපත් කෙරේ.

    2020 මැයි 25 දා මිනියාපොලිස් මිනිසෝටා හිදී සුදු ජාතික පොලිස් නිලධාරියෙකු විසින් කලු ජාතික ජෝර්ජ් ෆ්ලොයිඩ්(GEORGE FLOYD ) බෙල්ල පාගා ගෙන සිටිමින් හුස්ම හිරකර මරා දැමුවේය. තවත් පොලිස් නිලධාරීන් දෙදෙනෙකු ද එය බලාගෙන සිටියහ . මේ අමානුෂික මිනීමැරුම ඇතමුන් වීඩීයෝ ගත කලේ හොලිවුඩ් චිත්‍රපටයක් රූ ගත කරන අයුරිනි . මැයි 25 දා ඩෙරෙක් චවින්(DEREK CHAUVIN) නැමති සුදු ජාතික පොලිස් නිලධාරියා විනාඩි 2යි තත්පර 53ක කාලයක් මෙසේ කලු ජාතික ජෝර්ජ් ෆ්ලොයිඩ් ගේ බෙල්ල පාගා ගෙන සිටි බව කියනු ලැබේ . කලු ජාතිකයාගේ මරනය සිදුකල ඩෙරෙක් චවින් සහ එහි සිටි ඇලෙක්සැන්ඩර් සහ තෝමස් යනඅනිත් පොලිස් නිලධාරීන් දෙදෙනා වහාම අත් අඩංගුවට ගනු ලැබූහ . ඔවුන්ට ඇප ලබාදීම උසාවිය මගින් ප්‍රතික්ෂේප කරනු ලැබීය . ඔවුන්ට එරෙහිව නීතිය ක්‍රියාත්මක කරන බව බලධාරින් නිවේදනය කලහ. මේ මුලු මහත් සිද්ධි සමුදායේ සම්පිණ්ඩනය මෙයයි .

    මේ සිද්ධියෙන් පසු මුලු අමෙරිකාව ම ගිනි ගත්තේ ය. කොරෝනා මකරා ? ගේ ග්‍රහනයට හසුවී ලක්ශ 19 ක් පමන (18,22,392) රෝගීන් බවට පත්වී එක් ලක්ශ පන්දාහකට (1,05,704) වැඩි පිරිසක් මියගොස් ඇති මොහොතක අමෙරිකාවේ සිදුවෙමින් පවතින මේ භීෂණකාරී වාතාවරණය කෙසේ සමතයකට පත්වනු ඇද්ද? කෙසේවුවත් මුලු මහත් අමෙරිකාවේ ප්‍රධාන නගර 60 ක පමන දැන් පවතින්නේ යුද්ධයක් වැනි කෝලාහලය කි . වඩාත් බිහිසුණු ස්වාභාවය ක් පවතින්නේ ලොස් ඇන්ජලිස්හි සාන්ත මොනිකා (LA -SANTA MONICA ),චිකාගෝ , නිව්යෝර්ක් ,හා වොෂින්ටන් ඇතුළු තවත් නගර 47 කය. මිනසෝටාහි පොලිස් මිනීමැරුම සිදුවී දින 5 කට පසු එහි සිට කි මී 1000,2000,5000හා කි මී 6000 ටත් වැඩි දුර පිහිටි විවිධ නගර වල මෙසේ හොරුන් මංකොල්ල කරුවන් අපරාධ කරුවන් කුඩු කාරයින් පාතාල කල්ලි මෙහෙය වන්නන් ම්ලේච්ඡ අයුරින් නීතිය සියතට ගනිමින් හැසිරීම ඉමහත් ඛේදවාචකයකි. පොලිසියට එරෙහිව ඇරඹු කැ රැල්ල දැන් අමෙරිකා රජයට එරෙහි විප්ලවයක් බවට පත් වෙමින් පවතී. බලධාරින් පොලිසියට නියෝග කර ඇත්තේ කුමන හේතුව කටවත් උද්ඝෝෂකයන්ට වෙඩි නොතබන ලෙසටද ගිනි අවි භාවිතා නොකර න ලෙසටයි. නගර 50 කට වැඩි සංඛ්‍යාවක ගොඩනැගිලි 1000 කට වඩා ගිනි තබා ඇත . විවිධ ප්‍රාන්ත වල තුවාල ලබා ඇති පොලිස් නිලධාරීන් සංඛ්‍යාව 900 ඉක්මවා තිබේ . පොලිස් වාහන 200ක් පමන ගිනි තබනු ලැබීය . දැවැන්ත වෙළඳ ශාලා කඩා සොරකම් කල භාන්ඩ වල වටිනාකම ඩොලර් බිලියන ගනනකි. උද්ඝෝෂකයන් ගෙන් සියයට 90 ක් පමන කලු ජාතිකයන් ය. සුදු ජාතිකයන් සහ ස්පාඤ්ඤ භාශාව කතා කරන (SPANISH ) අයද දීප ව්‍යාප්ත උද්ඝෝෂනවලට සහභාගි වී සිටිති. පොලිස් රථ ගිනි තැබිම,පොලිස් නිලධාරීන්ගේ මුහුනට කෙල ගැසීම ,පොලිස් වාහන වල තීන්ත ගෑම ,ගල් මුල් වලින් පහර දීම ,පොලිසියට ජල ප්‍රහාර එල්ල කිරීම පොලිසියට ලංකාවේ පාර්ලිමේන්තුවේ මෙන් මිරිස් කුඩු ප්‍රහාර එල්ල කිරීම කලු ම්ලෙච්ඡයින් (කලු ජාතිකයන් සියල්ලන්ම නොවේ ) බී එම් බබ්ලිව් බෙන්ස් ආදී වාහන සොරකම් කරගෙන පැමිණ දැවැන්ත සාප්පු සංකීර්ණ වලින් ඩොලර් කෝටි ගනන් වටිනා විද්‍යුත් උපකරණ (ඇපල් ජංගම දුරකථන ,ලැප් ටොප් ,කොම්පියුටර් ,රූපවාහිනී යන්ත්‍ර ආදිය) සොරකම් කර එම රථ වලට පටවාගෙන නීතිය බල්ලට ? දමා පලා යාම කොරෝනා මරගාතයට මුවාවී මුහුනු ආවරන(මාස්ක්) සහ වෙස් මුහුනු හදුනා ගැනීමට නො හැකි අයුරින් දමා ගෙන අවිනීත ලෙස හැසිරීම මා පසුගිය දෙදින තුලිදී අමෙරිකාවේදී දුටු අප්‍රසන්න සිද්ධීන්ය.එමෙන්ම මේ ජරමර අස්සේ නීති විරෝධී සංක්‍රමණිකයන්ද කොරෝනා වසංගතය නිසා රැකියා අහිමි වූවන්ද තම ඉල්ලීම් ඉදිරිපත් කරමින් ට්‍රම්ප් ජනපති පතුරු ගසමින් මහමගට බැස ඇති අයුරු ද දුටුවෙමි .

    මෙසේ රටේ අවදානම් තත්ත්වයක් පවතිද්දී රාජ්‍ය බලය අල්ලා ගැනීමට දේශපාලකයන් රිපබ්ලික් (අලියා )සහ ඩිමොක්‍රැටික් (බූරුවා) වශයෙන් දෙපිලකට බෙදී ගහ මරා ගනිමින් කුලල් කා ගන්නා අයුරුද දුටුවෙමි . බොහෝ මාධ්‍ය වාර්තා දක්වා තිබුනේ ට්‍රම්ප්ගේ ජනප්‍රියත්වය පහත බසිමින් පවතින බවය. 1906 අට්ලාන්ටා 1917 සෙන්ට් ලුවිස් 1919 ඔමාහා හා ච්කාගෝ 1921 ඔක්ලහෝමා,1943 ඩෙට්‍රෝයි,1967 නෙවාර්ක්,1968 නගර 125 ක,1991 ලොස් ඇන්ජලිස්හිදි කළු ජාතිකයන්ගේ පීඩනය ඉස්මතු විය . කලු ජාතිකයන්ගේ උන්නතිය උදෙසා උදාර සටනක නිරත වූ මාටින් ලූතර් කිං 1968 අප්‍රෙල් 4දා මරා දැමූවිට එදා අමෙරිකාව පුරා සති කීපයක්ම මෙසේ උද්ඝෝෂන සිදුවිය . අමෙරිකාවේ කලු ජාතිකයන් වෙනුවෙන් ඔහු එදා දිවි පිදූ විට ඔහුගේ වයස අවුරුදු 39 කි, වොෂින්ටන් හි ලින්කන් චතුරශ්‍රය අසලදී මීට වසර 53 කට ඉහතදී I HAVE A DREAM මට සිහිනයක් ඇත යනුවෙන් ඔහු පැවැත්වූ කතාව ලොවට ? කිසිදාක අමතක නොවේ . ඔහුගේ මරනයෙන් පසු එදා අමෙරිකාව පුරා සුදු කලු යුද්ධය ඇරඹුණේ ය. ගිනිතබා පොලවට සමතලාවූ ගොඩනැගිලි සංඛ්‍යාව 1200 කට අධිකය .කලු ජාතිකයන් අති විශාල සංඛ්‍යාවක් මරා දමනු ලැබීය.

    1991 මාර්තු 3දා නිව්යෝර්ක්හිදී කලු ජාතික රොඩ්නි කිංට (RODNEY KING ) දස වද දුන් අවස්තාවේ දීද රටේ කලබල සිදුවිය.රොඩ්නි කිංට වද දුන් පොලිස් නිලධාරීන් දීර්ඝ කාලයකට සිර භාරයට යවනු ලැබූහ . රොඩ්නි කිංට ඩොලර් මිලියන 3.8 ක වන්දි මුදලක් රජයෙන් ගෙවනු ලැබීය . අමෙරිකාවේ කලු ජාතිකයන්ට එරෙහිව මෙසේ විවිධ අයුක්ති සහගත ක්‍රියාවන් රාශියක් සිදුවී තිබේ . අද අමෙරිකාවේ කලු ජාතිකයන්ගේ ජනගහනය ලක්ශ 500ක් හෙවත් කෝටි 5 කට අධිකය .2018 සංඛ්‍යා ලේඛන දක්වන්නේ කලු ජනගහනය 4,78,41,851ක් බවය. මීට වසර 180 කට පමන පෙර අමෙරිකාවේ මහා මාර්ග දුම්රිය මාර්ග විවිධ ඉදිකිරීම් සදහා වහල් සේවය තකා අප්‍රිකානු රටවලින් ගෙන එන ලද අයගෙන් පැවත එන පිරිස් අප්‍රිකානු අමෙරිකානුවන් යනුවෙන් හදුන්වනු ලැබේ . අමෙරිකාවේ 44 වැනි ජනාධිපති බරාක් ඔබාමා කලු ජාතිකයෙකි. ඔහු 2009 ජනවාරි 20 සිට 2017 ජනවාරි 20 දක්වා අවුරුදු 8 ක් ජනපති පදවිය දැරුවේය. ඔබාමා 2009 ජනවාරි 20 දා ජනපති පදවියෙහි දිව්‍ රුම් දුන් අවස්තාවේ මා ඉරිදා ලංකාදීපයේ පලකල ලිපියෙහි සිරස්තලය වූයේ “අමෙරිකා සිහිනය සැබෑ කරගත් ඔබාමා ” යනුවෙනි . මා එසේ සදහන් කලේ ඔබාමා මාර්ටින් ලූතර් කිං ගේ සිහිනය සැබෑ කරගත් හැටි පෙන්වා දෙමිනි. කලු ජාතිකයෙකු අමෙරිකාවේ ජනපති පදවියට පත්වීම තුලින් ලොවට ? කියා පාන්නේ අමෙරිකාවේ ප්‍රජාතන්ත්‍රවාදය සුරක්ෂිතව ක්‍රියාත්මක වන බව නොවන්නේ ද? කලු ජාතිකයෙකු වසර 8 ක් ජනපති පදවිය දැරූ වාතාවරණයක් තුලදී අමෙරිකාවේ කලු ජාතිකයන්ට ස්වකීය සියලු ඉල්ලීම් ඉටු කර ගැනීම ට නො හැකි වීද?

    මීට පෙර අමෙරිකාවේ ආරක්ෂක උපදේශක පදවිය දැරුවේ කලු ජාතික කොන්ඩලීසා රයිස් ය. දෙවරක්ම මුලු මහත් අමෙරිකාවේ නීතිපති පදවියද රාජ්‍ය ලේකම් තනතුර ද දැරුවේ කලු ජාතිකයන් ය. අමෙරිකාවේ සියලුම හමුදා ප්‍රධානියා වූයේ ද කලු ජාතිකයෙකු වූ ජනරාල් කොලින් පවල්ය.(COLIN POWELL) මා මෙම උදාහරණ කීපය ඉදිරිපත් කලේ අමෙරිකාවේ කලු ජාතිකයන්ට එහි ඉහලටම යාමට ඉඩ ලැබී ඇති බව පෙන්වා දීමටය. අමෙරිකාව ගිනි ගෙන අවසන්‍ ය. මුලු මහත් අමෙරිකාවේ කෝටි 33කට අධික ජනතාවගේ ආරක්ෂාව තකා තමා ගන්නා පියවර කවරේදැයි ඉදිරි දින කීපය තුල බලාගත හැකි බව ජනපති ට්‍රම්ප් ජනතාව අමතා පැවසීය. කෝටි 5 ක් පමන වූ කලු ජාතිකයන් ගෙන් සුලු පිරිසක් සහ තම දේශපාලන විරුද්ධ වාදීන් ගෙන් පිරිසක් රට අස්තාවර කිරීමේ අසාර්ථක උත්සාහය ක නිරත වී සිටින බවද ඔහු පැවසීය . මුළු ලෝකයේ හැම රටකම පාහේ හැම කුණු ගොඩකටම පාහේ කර දෙන්නට සිදුවී ඇත්තේ පොලිස් නිලධාරීන්ටය . ජනතාවගෙන් වැඩි පුරම බැනුම් අහන්නේද පොලිසියයි. පොලිසිය දරු පවුල් පිටින් ජීවත් වන සාමාන්‍ය මනුෂ්‍ය යින් බව ජනතාව ට අමතක ය. මෙම කරුනු මා සදහන් කලේ මගේ පුත්‍රයාද පොලිස් නිලධාරියෙකු වශයෙන් අමෙරිකාවේ නීතිය හා සාමය රැකීමට පොලිස් බල ඇනි මෙහෙයවමින් දිවා රාත්‍රී කැපවී රාජකාරි සිදු කරන අයුරු දුටු නිසාය.

    වසර 3කට පස්සේ මෙරට නිෂ්පාදන අංශයේ ඉහළම අගය වාර්තා කරයි

    0

    මෙරට තුළ නිෂ්පාදන අංශයේ වසර තුනකින් වාර්තා කළ ඉහළම අගය ගෙවුණු මාර්තු මාසයේදී වාර්තා කර ඇතැයි ශ්‍රී ලංකා මහබැංකුව පවසයි.

    නිෂ්පාදන ක්‍රියාකාරකම්වල වර්ධනයක් පිළිබිඹු කරමින්, නිෂ්පාදන අංශයෙහි ශ්‍රී ලංකා ගැනුම් කළමණාකරුවන්ගේ දර්ශකය 2024 මාර්තු මාසයේ දී දර්ශකාංක 62.5ක් වාර්තා කර ඇත.

    එමෙන්ම මෙරට සේවාවල ද ගිය මාර්තු මාසයේ දී වර්ධනයක් පෙන්නුම් කර ඇත.

    ප්‍රධාන වශයෙන් උත්සව සමයේ ඉල්ලුම ඉහළ යෑම හේතුවෙන් සියලුම උප දර්ශක පෙර මාසය හා සැසඳීමේදී ඉහළ යෑම හේතු විය.

    මහබැංකු දත්තවලට අනුව ආහාර හා පානවර්ග නිෂ්පාදන අංශය සහ රෙදිපිළි සහ ඇඟලුම් නිෂ්පාදන අංශය නව ඇණවුම් සහ නිෂ්පාදන ඉහළ යෑම සඳහා ප්‍රධාන වශයෙන් දායක වී ඇත.

    විශේෂයෙන් ආහාර සහ පානවර්ග නිෂ්පාදනය කරන්නන් ඇතුළුව බොහෝ නිෂ්පාදකයින් එළඹෙන උත්සව සමය පිළිබඳව සුභවාදී අදහස් පල කරන බව මහබැංකුව පෙන්වා දෙයි.

    මේ අතර, නව ඇණවුම් සහ නිෂ්පාදන ඉහළ යෑම හා සමගාමීව සේවා නියුක්තිය සහ තොග මිලදී ගැනුම් ද ඉහළ යන ලදී.

    තවද, මිල මට්ටම්වල පහත වැටීමක් ද වාර්තා විය.

    මේ අතර, ඇණවුමක් සැපයීමට සැපයුම්කරුවන්ට ගතවන කාලය පෙර මාසයට සාපේක්ෂව මාර්තු මාසයේ දී අඩු වේගයකින් වුවද ඉහළ යන ලදී.

    ඉදිරි මාස තුන තුළ නිෂ්පාදන කටයුතු සඳහා වන අපේක්ෂාවන් ඉහළ මට්ටමක පවතියි. කෙසේ වෙතත්, උත්සව සමය අවසන් වීමෙන් පසු අප්‍රේල් මාසයේදී නිෂ්පාදනයේ යම් අඩුවීමක් අපේක්ෂා කරන බව ප්‍රතිචාර දැක්වූ බොහෝ දෙනෙක් සඳහන් කළහ.

    සේවා අංශයෙහි ශ්‍රී ලංකා ගැනුම් කළමනාකරුවන්ගේ දර්ශකය, එනම් ව්‍යාපාර ක්‍රියාකාරකම් දර්ශකය, 2024 මාර්තු මාසයේ දී දර්ශකාංක 67.7ක් වාර්තා කරමින් සේවාවල තවදුරටත් වර්ධනයක් පෙන්නුම් කළේය.

    ව්‍යාපාර ක්‍රියාකාරකම්වල මෙම අඛණ්ඩ වර්ධනය සඳහා උප අංශ ගණනාවක වාර්තා වූ ඉහළ යෑම් හේතු විය.

    ඒ අනුව, උත්සව සමයේ විකුණුම් ඉහළ යෑම් හේතුවෙන් තොග සහ සිල්ලර වෙළෙඳාම උප අංශය සැලකිය යුතු ප්‍රගතියක් වාර්තා කර ඇත.

    තවද, මූල්‍ය සේවා උප අංශයේ ව්‍යාපාර ක්‍රියාකාරකම්, ලිහිල් මුදල් ප්‍රතිපත්ති ස්ථාවරයට සමගාමීව අඛණ්ඩව වර්ධනය විය. මේ අතර, ඉහළ සංචාරක පැමිණීම් හේතුවෙන් නවාතැන් හා ආහාර පාන සැපයීමේ සේවා උප අංශය අඛණ්ඩව වර්ධනය වූ අතර, ප්‍රවාහන, අනෙකුත් පෞද්ගලික සේවා කටයුතු සහ වෘත්තීය සේවා උප අංශ ද මාර්තු මාසය තුළ ධනාත්මක වර්ධනයන් වාර්තා කළේය.

    ප්‍රධාන වශයෙන්, තොග සහ සිල්ලර වෙළෙඳාම, මූල්‍ය සේවා, රක්ෂණ ප්‍රවාහන සහ වෘත්තීය සේවා යන උප අංශ වල ඉහළ යෑම් සමඟ මාර්තු මාසයේදී ඉහළ ගියේ ය.

    IMF-ශ්‍රී ලංකා ඊළඟ පියවර ගැන වොෂිංටනයේදී සාකච්ඡාවක්

    0

    ජාත්‍යන්තර මුල්‍ය අරමුදලෙ හි වැඩසටහනේ 2 වැනි සමාලෝචනය අවසන් කිරීම සඳහා වන ඊළඟ පියවර පිළිබඳව ජාත්‍යන්තර මුල්‍ය අරමුදලේ නියෝජ්‍ය කළමණාකාර අධ්‍යක්ෂ කෙන්ජි ඔකමුරා මහතා මෙරට රජය සමඟ ඊයේ සාකච්ඡාවක නිරත වී තිබේ.

    ඒ ජාත්‍යන්තර මුල්‍ය අරමුදලේ හා ලෝක බැංකුවේ “වසර මැද ස්ප්‍රිං සමුළුව” අමරිකාවේ වොෂිංටන් ඩී.සී. හි දී ඊයේ (15) පැවති අවස්ථාවේදී ය.

    ණය ප්‍රතිව්‍යුහගත කිරීමේ ප්‍රගතිය මෙන්ම ගෙවුණු මාර්තු මාසයේ දී එළඹුණු කාර්ය මණ්ඩල මට්ටමේ ගිවිසුමෙන් පසුව ඉදිරි පියවර පිළිබඳ එහිදී සාකච්ඡා කර ඇත.

    ආර්ථික ප්‍රතිසංස්කරණ වැඩසටහනේ ප්‍රගතිය පිළිබඳව සහ ශක්තිමත් වැඩසටහන් ක්‍රියාත්මක කිරීම සම්බන්ධව ඔකමුරා මහතා ශ්‍රී ලංකා රජයට ප්‍රශංසා කරනු ලැබිය.

    ජාත්‍යන්තර මූල්‍ය අරමුදලේ වැඩසටහන ආරම්භයේ සිටම ශ්‍රී ලංකාව අත්කරගත් ජයග්‍රහණ ආරක්ෂා කර ගනිමින් ශක්තිමත් හිමිකාරීත්වයක් පවත්වාගෙන යාමේ අවශ්‍යතාව ඔහු අවධාරණය කර තිබේ.

    මෙහි දී මෑතකාලීන සමාජ – ආර්ථික වර්ධනයන් සහ වැඩසටහන යටතේ සිදු කරන ලද සාර්ව ආර්ථික ප්‍රතිපත්ති සහ ප්‍රතිසංස්කරණවල අඛණ්ඩතාව සහ ස්ථාවරත්වය සහතික කිරීමට ශ්‍රි ලංකාව සිදු කළ කැපකිරීම පෙන්වා දෙනු ලැබීය.

    එමෙන්ම ඉන්දියාව සහ ශ්‍රී ලංකාව සඳහා විධායක අධ්‍යක්ෂ ආචාර්ය ක්‍රිෂ්ණමූර්ති සුබ්‍රමනියන් මහතා සහ රාජ්‍ය අමාත්‍යවරයා අතර හමුවක් ද පැවැත්විණ.

    මේ සඳහා ශ්‍රී ලංකාව නියෝජනය කරමින් මුදල් රාජ්‍ය අමාත්‍ය ශෙහාන් සේමසිංහ මහතා ඇතුළු නියෝජිත පිරිසක් සහභාගී වී සිටී.

    ඊට සමගාමීව ශ්‍රී ලංකා ආර්ථිකයේ ස්ථාවරත්වය, වර්ධනය සහ ආයෝජන අවස්ථාවන් පිළිබඳව ජාත්‍යන්තර අවබෝධය සඳහා වූ ව්‍යාපාරික කවුන්සිලය (BCIU) සමඟ මුදල් රාජ්‍ය අමාත්‍යවරයා සාකච්ඡාවට එක්ව තිබේ.

    මෙම සාකච්ඡාව ආයෝජකයින් සඳහා ශ්‍රී ලංකාවේ ඇති අවස්ථාවන් පිළිබඳව කේන්ද්‍රගතවු අතර අධ්‍යාපනය, සංචාරක ව්‍යාපාරය, පුනර්ජනනීය බලශක්තිය, කෘෂිකර්මය සහ තාක්‍ෂණය ඇතුළු විවිධ ක්ෂේත්‍රවල උපායමාර්ගික ආයෝජන මගින් තිරසාර ආර්ථික වර්ධනයක් ළඟා කරගත හැකි අයුරු සාකච්ජා කර ඇත.

    මෑත කාලීන ආර්ථික හා අනෙකුත් ප්‍රතිසංස්කරණ, ප්‍රතිඵලවලට පරිවර්තනය වී ඇති ආකාරය ඇතුළුව ශ්‍රී ලංකාව සම්බන්ධව ජාත්‍යන්තර මුල්‍ය අරමුදලේ වැඩසටහන හා වත්මන් සාර්ව-ආර්ථික වැඩපිළිවෙළ ද මෙහි දී සාකච්ජා කර තිබේ.

    ශ්‍රී ලංකා ආර්ථිකයේ අවස්ථාවන් පුළුල් කිරීමට ජාත්‍යන්තර අවබෝධය සහ සහයෝගීතාව වැඩි කිරීමට සහභාගිවුවන්, පාර්ශවකරුවන් සහ ගෝලීය හවුල්කරුවන් දක්වන උනන්දුව සනිටුහන් කරමින් සංසදය අවසන් විය.

    මේ අතර ඉන්දියාව සහ ශ්‍රී ලංකාව සඳහා ලෝක බැංකුවේ විධායක අධ්‍යක්ෂ පරමේෂ්වරන් අයියර් මහතා සමඟ ද මුදල් අමාත්‍යවරයා මෙම සංචාරයේ දී සාකච්ඡා කර තිබේ.

    මෙහි දී දුෂ්කර ප්‍රතිසංස්කරණ මාලාව ක්‍රියාත්මක කිරීම සම්බන්ධයෙන් ශ්‍රී ලංකා රජයට ප්‍රශංසා පළ වී ඇති අතර ලෝක බැංකුවේ විවිධ අභ්‍යන්තර ප්‍රතිව්‍යුහගත කිරීම් සහ මෙම වෙනස්කම් ශ්‍රී ලංකාව වැනි රටවලට ප්‍රයෝජන ගත හැකි ආකාරය පිළිබඳව දැනුවත් කරමින් සහ ශ්‍රී ලංකාවට තම උපරිම සහයෝගය ලබා දෙන බවට සහතික කරමින් සාකච්ඡාව නිමාවට පත් විය.

    දිසා විනිසුරුට SI මස්සිනාගෙන් ප්‍රහාරයක් -විනිසුරු බිරිඳ කම්පනයෙන් මියයයි

    0

    දකුණේ අධිකරණයක සේවයේ නිරත දිසා විනිසුරුවරයෙකුට පහරදීමක් සම්බන්ධයෙන් කළුතර දකුණ පොලිස් ස්ථානයේ සේවයේ නිරත උප පොලිස් පරීක්ෂකවරයෙකුව අක්මීමණ පොලීසිය විසින් අත්අඩංගුවට ගෙන ඇත.

    මෙම පහරදීමෙන් කම්පනයට පත්වූ දිසා විනිසුරුවරයාගේ බිරිඳ කම්පනයෙන් මියගොස් ඇති බව පොලීසිය කියයි.

    දිසා විනිසුරුවරයා විවහාවී සිටින්නේ උප පොලිස් පරීක්ෂකවරයාගේ සහෝදරිය බවද පොලීසිය සඳහන් කළේය.

    මෙම දිසා විනිසුරුවරයා සිය බිරිඳ සමඟ බිරිඳගේ මව පදිංචිව සිටින ගාල්ලේ පිහිටි නිවසට පසුගිය 13 වෙනිදා අලුත් අවුරුද්ද වෙනුවෙන් ගොස් ඇත. ඒ යන විට ඔවුන් සිය නිවසේ සුරතලයට ඇතිකරනු ලබන බළලෙකුද රැගෙන ගොස් තිබේ. අවුරුද්ද සමරා ඔවුන් නැවත 14 වෙනිදා රාත්‍රී කාලයේ එම නිවසින් පිටත්ව සිය නිවස වෙත ගමන් කිරිමට සූදානම් වූ අවස්ථාවේදී රැගෙන පැමිණි සුරතල් බළලාව සොයා ඇත. ඒ බළලා නිවසේ නොසිටි බැවිනි.

    එම අවස්ථාවේදී විනිසුරුවරයා සහ ඔහුගේ මස්සිනා වන උප පොලිස් පරීක්ෂකවරයා අතර ආරවුලක් ඇතිවී තිබේ. එම අවස්ථාවේදී උප පොලිස් පරීක්ෂකවරයා දිසා විනිසුරුට පරුෂ වචනයෙන් බැන වැදී තර්ජනය කරමින් පහරක් එල්ලකර ඇත.

    මෙම පහරදීම සම්බන්ධයෙන්දිසා විනිසුරුවරයා අක්මීමන පොලිස් ස්ථානයට පැමිණිල්ලක් ඉදිරිපත්කර තිබේ. එම පැමිණිල්ලට අනුව පොලිස් පරීක්ෂකවරයෙක් පැමිණ ප්‍රකාශ සටහන්කර ගන්නා අවස්ථාවේදී විනිසුරු බිරිඳ කම්පනයට පත්ව කරාපිටිය රෝහලට ප්‍රතිකාර ගැනීමට ඇතුලත් කර සිටියදී මියගොස් තිබෙන බව පොලීසිය කියයි.

    මෙම සිදුවීම සම්බන්ධයෙන් උප පොලිස් පරීක්ෂකවරයාව අත්අඩංගුවට ගත් බවත් ඔහුව අද අධිකරණයට ඉදිරිපත්කරන බවත් පොලීසිය කියයි.

    ඇමතිවරයෙක් ගිය රථයක් ගිනිගනී

    0

    රාජ්‍ය අමාත්‍ය චාමර සම්පත් දසනායක මහතා ගමන් කරමින් සිටි රථය බණ්ඩාරවෙල හල්පේ ප්‍රදේශයේදී අද අලුයම හදිසි ගිනිගැනීමකට ලක්ව ඇතැයි වාර්තා වේ.

    ගින්න හේතුවෙන් රාජ්‍ය අමාත්‍යවරයාට හෝ රියදුරාට හානියක් සිදුව නොමැත.

    අද අලුයම 12.45ට පමණ මෙම සිදුවීම වී ඇති බව සඳහන් ය.

    රාජ්‍ය අමාත්‍යවරයා මහියංගනය ප්‍රදේශයේ සිට ඇල්ල ප්‍රදේශය දක්වා පැමිණෙමින් සිටියදී මෙය සිදුව ඇත.

    බණ්ඩාරවෙල මහ නගර සභාවේ ගිනි නිවන ඒකකය ඇල්ල පොලීසිය සහ ප්‍රදේශවාසීන් එක්ව ගින්න නිවාදැමීමට කටයුතු කර තිබේ.

    මැදපෙරදිග කලාපයේ තත්ත්වය උග්‍රවීම වළක්වන්න සංයමයෙන් වැඩකරන්නැයි රටවල් රැසක් ඉල්ලයි

    0

     
    මැදපෙරදිග කලාපයේ තත්ත්වය උග්‍රවීම වැළැක්වීම සඳහා සංයමයෙන් ක්‍රියා කරන්නැයි  රටවල් රැසක නියෝජිතයෝ අදාළ පාර්ශ්වයන්ගෙන් ඉල්ලා සිටිති.
     
    ඊයේ (14) අලුයම, ඊශ්‍රායලය ඉලක්ක කරගනිමින් මිසයිල හා ඩ්‍රෝන ප්‍රහාර එල්ල කළ බව ඉරාන ඉස්ලාම් විප්ලවීය හමුදාව පැවසීය. ඊශ්‍රායල ආරක්ෂක හමුදාව ප්‍රකාශ කළේ එම ඩ්‍රෝන යානා සහ මිසයිල කිහිපයක් තම ප්‍රහාරක යානා මගින් බිම හෙළූ බවයි.
     
    මේ තත්ත්වය සම්බන්ධයෙන්, නිවේදනයක් නිකුත් කළ රුසියානු විදේශ අමාත්‍යාංශය සංයමයෙන් ක්‍රියා කරන ලෙස අදාළ සියලු පාර්ශ්වයන්ගෙන් ඉල්ලා සිටියේය.
     
    මේ අතර, ඇමරිකානු ජනාධිපතිවරයා සමග ඊයේ (14)  දුරකථන සංවාදයක නිරත වූ ජෝර්දානයේ දෙවැනි අබ්දුල්ලා රජු ද, ඊශ්‍රායලයේ ඕනෑම උග්‍ර පියවරක් මැදපෙරදිග කලාපයේ ගැටුම් ව්‍යාප්ත කිරීමට හේතු වනු ඇති බවට අනතුරු අඟවා ඇත.
     
    තුර්කි විදේශ අමාත්‍යාංශය නිවේදනයක් නිකුත් කරමින් ප්‍රකාශ කළේ, ඊශ්‍රායලය සිරියාවේ ඉරාන තානාපති කාර්යාල ගොඩනැගිල්ලට ප්‍රහාරයක් එල්ල කිරීම ජාත්‍යන්තර නීතිය උල්ලංඝනය කිරීමක් බවයි.

    එසේම, මේ තත්ත්වය සමනය කරගැනීමට පියවර ගන්නැයි චීනය ද ඉල්ලීමක් කරයි.
     
    මීට අමතරව, බ්‍රසීලය, මෙක්සිකෝව, වෙනිසියුලාව සහ කොලොම්බියාව වැනි ලතින් ඇමරිකානු රටවල් ද උපරිම සංයමයකින් ක්‍රියා කරන ලෙස අදාළ පාර්ශ්වයන්ගෙන් ඉල්ලා සිටී.

    ඉන්දියාවෙන් අවුරුදු තෑග්ගක් -ලංකාවට තිබූ ළූනු තහනම ඉවතට

    0

    ශ්‍රී ලංකාව සඳහා ද පනවා තිබූ ළූනු අපනයන තහනම ඉන්දීය රජය විසින් ඉවත් කර ඇති බව කොළඹ ඉන්දීය මහ කොමසාරිස් කාර්යාලය පවසයි.

    ඉන්දියාවේ විදේශ වෙළෙඳ අධ්‍යක්ෂ ජනරාල්වරයාගේ දැනුම්දීම අනුව ළූණු මෙට්‍රික් ටොන් 10,000ක් දක්වා අපනයනය කිරීමට අවසර දී ඇති අතර ශ්‍රී ලංකාවට ළූණු අපනයනය කිරීමට ද එමගින් අවසර දී ඇත.

    ශ්‍රී ලංකාව සඳහා වූ මෙම අපනයන ලිහිල් කිරීම ඉන්දියාවේ ‘අසල්වැසියා ප්‍රථමයෙන්’ ප්‍රතිපත්තිය නැවත අවධාරණය කරන අතරම මෙරට සිංහල සහ දෙමළ අලුත් අවුරුදු උත්සව සමය වෙනුවෙන් එක්කිරීමක් බවද ඉන්දීය මහ කොමසාරිස් කාර්යාලය සඳුදා නිවේදනයක් නිකුත් කරමින් කියා සිටියේය.

    පසුගිය මාසයේදී ඉන්දියාව ළූණු අපනයනය සඳහා වූ තහනම දින නියමයක් නොමැතිව දීර්ඝ කළේ සමහර විදේශීය වෙලඳපොලවල ළූනු මිල අහස උසට යවමිනි.

    ලොව විශාලතම එළවළු අපනයනකරු වන ඉන්දියාව විසින් දෙසැම්බර් මාසයේදී පැනවූ තහනම මාර්තු 31 දිනෙන් අවසන් වීමට නියමිතව තිබුණි.

    ශ්‍රී ලංකාව, බංග්ලාදේශය, මැලේසියාව, නේපාලය සහ එක්සත් අරාබි එමීර් රාජ්‍යය වැනි රටවල් ළූණු සැපයුමේ දේශීය හිඩැස් පිරවීම සඳහා සාමාන්‍යයෙන් ඉන්දියාවේ ආනයනය මත රඳා පවතී.

    එහෙත් මෙම තහනමෙන් පසු එම රටවල් බොහොමයක් ඉහළ මිල ගණන් සමඟ අරගල කරමින් සිටියේය.

    අදත් වහීවි -අකුණුත් ඒවි

    0

    අද දිනයේත් බස්නාහිර, සබරගමුව, මධ්‍යම සහ වයඹ පළාත්වලත් ගාල්ල සහ මාතර දිස්ත්‍රික්කවලත් ප.ව. 2.00 න් පමණ පසු තැනින් තැන වැසි හෝ ගිගුරුම් සහිත වැසි ඇති වන බව කාලගුණ විද්‍යා දෙපාර්තමේන්තුව පවසයි.

    හෙට (16) දිනය සඳහා ස වලංගු වන පරිදි අද(15) දින මධ්‍යහන 12.00 ට නිකුත්කරන ලද කාලගුණ අනාවැකියේ මේ බව සඳහන් වේ.

    ඒ අනුව නැගෙනහිර සහ ඌව පළාත්වලත් හම්බන්තොට දිස්ත්‍රික්කයේත් විටින් විට වැසි හෝ ගිගුරුම් සහිත වැසි ඇතිවේ. උතුරු-මැද පළාතේ වැසි වාර කිහිපයක් ඇතිවිය හැක.

    බස්නාහිර, සබරගමුව සහ වයඹ පළාත්වල ඇතැම් ස්ථානවල මි.මී. 75 ක පමණ තරමක තද වැසි ඇතිවිය හැක.

    බස්නාහිර, සබරගමුව සහ මධ්‍යම පළාත්වලත් ගාල්ල සහ මාතර දිස්ත්‍රික්කවලත් ඇතැම් ස්ථානවල උදෑසන කාලයේදී මීදුම් සහිත තත්ත්වයක් පැවතිය හැක.

    ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස ජනතාවට දැනුම් දේ.

    ගමේ ඉඳන් ‍කොළඹ එන්නත්, ගමට යන්නත් විශේෂ ප්‍රවාහන සේවය අද සිට

    0

    සිංහල දෙමළ අලුත් අවුරුදු නිවාඩුවට ගම්බිම් කරා ගිය ජනතාවට යළි කොළඹට පැමිණීම සඳහා විශේෂ දුම්රිය සේවා අද (15) ක්‍රියාත්මක කෙරේ.

    දුම්රිය දෙපාර්තමෙන්තුව පවසන්නේ මෙම විශේෂ දුම්රිය බදුල්ල, ගාල්ල හා බෙලිඅත්ත සිට කොළඹ දක්වා ධාවනය කෙරෙන බව ය.

    මේ අතර දුම්රියෙන් කොළඹට පැමිණෙන ජනතාව සඳහා කොළඹ සිට පිටපළාත් දක්වා ලංගම හා පෞද්ගලික බස් රථ ක්‍රියාත්මක කෙරෙන බව ද ප්‍රවාහන අමාත්‍යාංශය පවසයි.

    හිසතෙල් ගෑමේ නැකත උදාවෙයි

    0

    මේ සිංහල දෙමළ අලුත් අවුරුද්දේ හිසතෙල් ගෑමේ නැකත උදාවී තිබේ.

    අද දින එනම් අප්‍රේල් මස 15 වන සඳුදා පූර්වභාග 10.17ට ශ්වේත වර්ණ හෙවත් සුදු පැහැති වස්ත්‍රාභරණයෙන් සැරසී දකුණු දිශාව බලා හිසට දිවුල්පත් ද පයට ඉඹුල්පත් ද තබා දිවුල්පත් යුෂ මිශ්‍ර නානු හා තෙල් ගා ස්නානය කිරීම මැනවි යැයි නැකැත් සීට්ටුවේ සඳහන් වේ.

    හිසතෙල් ගෑමේ ජාතික උත්සවය අද(15) වත්තල හැඳල පුරාණ රජමහා විහාරයේදී අගමැති දිනේෂ් ගුණවර්ධන මහතාගේ ප්‍රධානත්වයෙන් පැවැත්වේ.

    දේශීය වෛද්‍ය අමාත්‍යාංශය විසින් මෙම ජාතික උත්සවය සංවිධානය කරනු ලබයි.

    අද දින පෙරවරු 10.17ට යෙදෙන සුබ නැකතට හිස තෙල් ගෑමේ උත්සවය ආරම්භ විය.

    දේශීය වෛද්‍ය රාජ්‍ය ඇමති සිසිර ජයකොඩි මහතා පැවසුවේ අලුත් අවුරුදු උත්සවයේ අවසන් නැකත් චාරිත්‍රය වන පැළ සිටුවීම 18 වැනිදා කොළඹ හුණුපිටිය ගංගාරාම විහාර පරිශ්‍රයේදී පැවැත්වෙන බවත් එය ‘මුරුංගා දිනය’ ලෙස අමාත්‍යාංශය මගින් නම්කර ඇති ය.

    ඒ අනුව එදිනට අධිපෝෂණීය මෙන්ම ඉහළ ඖෂධීය වටිනාකමකින් යුත් මුරුංගා ශාකය තම ගෙවත්තේ පැළ කරන ලෙස සියලු ජනතාවගෙන් ඉල්ලා සිටින බවද රාජ්‍ය අමාත්‍යවරයා සඳහන් කළේය.

    ඊශ්‍රායලයට මිසයිල වරුසාවක් -යානයක එමින් සිටි ලාංකිකයන් ගැන දැනුම්දීමක් (📹)

    ඉරානය විසින් ඊශ්‍රායලයට ඊයේ රාත්‍රී (13) එල්ල කරන ලද මිසයිල හා ඩ්‍රෝන් ප්‍රහාර වරුසාව හමුවේ ඊශ්‍රායලයට පැමිණෙමින් තිබියදී යළි හරවා යැවූ යානයක සිටි බව කියන ශ්‍රී ලාංකිකයන් පිළිබඳ තොරතුරු ලබාගනිමින් සිටින බව ඊශ්‍රායලයේ සිටින ශ්‍රී ලංකා තානාපති නිමල් බණ්ඩාර මහතා පවසයි.

    Fly Dubai ගුවන් සේවයට අයත් FZ1625 දරන ගුවන් යානය ඊයේ රාත්‍රී 20.10 ඩුබායි සිට ටෙල් අවිව් දක්වා ගමන් කරමින් තිබිය දී ගුවන් ප්‍රහාර පිළිබඳව තොරතුරු අනාවරණය වීමත් සමඟම ගුවන් යානය යළිත් හරවා ඩුබායි බලා පියාසර කර ඇත.

    එහි ඊශ්‍රායලය බලා පැමිණීමට සිටි ශ්‍රී ලාංකිකයන් සිටි බවත් ඔවුන් පිළිබඳව තොරතුරු අනාවරණය කර ගැනීමට කටයුතු කෙරෙමින් පවතින බව හෙතෙම කීය.

    ඉරානය විසින් ඊශ්‍රායලයට ඊයේ රාත්‍රී (13) ෂෙල් හා මිසයිල ප්‍රහාර 500 කට වඩා ඊශ්‍රායලය ඉලක්ක කර එල්ල කර ඇතත් ඒ සියල්ල ගුවනේ දී විනාශ කිරීමට ඊශ්‍රායල් Iron Dome පද්ධතිය සමත් වූ බව ද තානාපතිවරයා කීය.

    කුඩා දැරියකට සිදුවූ තුවාලයක් හැරුණු විට ඊශ්‍රායලයේ කිසිඳු අයෙකුට මේ දක්වා අනතුරක් ඇතිවූ බව වාර්තා වී නැති බව තානාපතිවරයාගේ නිවේදනයේ දැක්වේ.

    පවතින තත්ත්වය හමුවේ ජෝර්දානය ලෙබනනය, ඉරාකය, ඊශ්‍රායලය, ආදී රටවල් හරහා සිදුවන ගුවන් ගමන්, එම කලාපය මඟහැර වෙනත් මාර්ග ඔස්සේ යුරෝපයේ රටවල් වෙත ගමන් කිරීම හේතුවෙන් අදාළ ගමන් සඳහා ගතවන කාලය මෙන්ම ප්‍රවේශපත්‍ර ගාස්තු ද ඉහල ගොස් ඇත.

    එම නිසා මැදපෙරදිග කලාපයේ හා යුරෝපීය රටවල් සඳහා ගමන් කිරීමට ගුවන් ටිකට්පත් ලබාගෙන ඇති පිරිස තම ගුවන් ගමන් බලපත් නැවත පරික්ෂා කරගන්නා ලෙස නිමල් බණ්ඩාර මහතා දැනුම් දෙයි.

    ඊශ්‍රායලයට පැමිණෙන හා ඊශ්‍රායලයෙන් පිටත්ව යන ගුවන් යානාවල ප්‍රමාදයන් පවතින බව ඔහු පෙන්වා දෙයි.

    2024 අප්‍රේල් මස 13 වැනිදා ශ්‍රී ලාංකිකයන් දෙදහසකගේ පමණ සහභාගිත්වයෙන් ජෙරුසෙලම් ගන්ශකර් ක්‍රීඩාංගනයේ දී රාත්‍රී 9 දක්වා බක්මහ උළෙල ඉතා සාර්ථකව පැවැත්වු බව ද තානාපතිවරයා සිහිපත් කළේය.

    එහි පැමිණි ශ්‍රී ලාංකිකයන් සියලු දෙනා බක්මහ සැමරුමෙන් අනතුරුව තම වාසස්ථාන කරා පිටත්ව ගොස් තිබු බවත් ඊශ්‍රායලයේ ශ්‍රී ලංකා තානාපති කාර්යාලය මෙහි සිටින ශ්‍රී ලාංකිකයන්ගේ ආරක්ෂාව පිළිබඳව නිරන්තර අවධානයෙන් පසුවන අතර ඔවුන්ගේ ආරක්ෂාව පිළිබඳව අනවශ්‍ය බියක් ඇතිකර නොගන්නා ලෙසත් තානාපතිවරයා වැඩිදුරටත් දන්වා සිටී.

    මේ අතර එරට පුවත් වාර්තා පෙන්වා දෙන්නේ ඊයේ ඉරානය විසින් ඊශ්‍රායලයට එල්ල කරන ලද මෙම පෙර නොවූ විරූ ප්‍රහාරයෙන් ඊශ්‍රායලයට ඩ්‍රෝන සහ මිසයිල 300කට වැඩි ප්‍රමාණයක් දියත් කළ බව ඊශ්‍රායල හමුදාව නිවේදනය කළ බවය.

    ඊශ්‍රායල හමුදා ප්‍රකාශක රියර් අද්මිරාල් ඩැනියෙල් හගාරි පැවසුවේ මෙම මිසයිල හා ෂෙල් දියත් කිරීම්වලින් 99%කටම බාධා කොට බිඳවැට්ටවූ බවයි.

    ඊශ්‍රායලයට ළඟාවීමට පෙර ඩ්‍රෝන යානා 170 ක් සහ කෲස් මිසයිල 30 ක් බිම හෙළා ඇති අතර, බැලස්ටික් මිසයිල 110 න් කිහිපයක් හරහා ගොස් වළක්වා තිබුණි. කෙසේවෙතත් 12 දෙනෙකුට තුවාල සිදුවූ බවට ද එම වාර්තාවල දැක්වේ.

    මෙය කලාපීය සතුරන් අතර දිගුකාලීන රහසිගත යුද්ධයේ ප්‍රධාන තීව්‍රතම අවස්ථාවක් බව ද එම හමුදා පවසා තිබුණි.

    ඉරානයට එරෙහි ඕනෑම නව ආක්‍රමණයකට එරෙහිව වැඩි බරක් ඇති කනගාටුදායක ප්‍රතිචාරයක් ලැබෙනු ඇතැයි ඉරාන ජනාධිපතිවරයා අවධාරණය කර තිබුණි.

    ඉරානයට එරෙහි කිසිදු ඊශ්‍රායල ප්‍රහාරයකට අමෙරිකාව එක් නොවන බව ජනාධිපති ජෝ බයිඩන් ප්‍රකාශ කර ඇත.

    අවුරුදු ගීතයක් විකෘති කොට සමාජ මාධ්‍යයට මුදාහැරි අය ගැන පරීක්ෂණයක්

    0

    සිංහල අවුරුදු ගීතයක් විකෘති කර, සමාජ මාධ්‍ය ඔස්සේ සංසරණය කිරීම පිළිබඳව සංස්කෘතික කටයුතු අමාත්‍යාංශය විසින් පරීක්ෂණයක් ආරම්භ කර තිබේ.

    වෙනත් වචන ආදේශ කරමින් එලෙස විකෘති කර ඇත්තේ, 2014 වසරේදී ස්වාධීන රූපවාහිනිය විසින් පවත්වන ලද අවුරුදු උළෙල වෙනුවෙන් සැකසූ තේමා ගීතයකි.

    සංස්කෘතික කටයුතු අමාත්‍ය විදුර වික්‍රමනායක මහතාගේ උපදෙස් මත මෙම පරීක්ෂණය ආරම්භ කර ඇත.

    විකෘති කරන ලද ගීතය සමාජ මාධ්‍යයට මුදාහැරි පුද්ගලයින් පිළිබඳව සොයාබලා වාර්තාවක් දෙන්නැයි, විදුලි සංදේශ නියාමන කොමිෂන් සභාවට උපදෙස් දුන් බව සංස්කෘතික කටයුතු අමාත්‍යාංශයේ ලේකම් සෝමරත්න විදානපතිරණ මහතා සඳහන් කළේ ය.

    ඒ අනුව අදාළ ගීතය විකෘති කළ පුද්ගලයින්ට එරෙහිව නීතිමය පියවර ගන්නා බව, සංස්කෘතික කටයුතු අමාත්‍යංශයේ ලේකම්වරයා කීය.

    ඉහත පැවසෙන පරිදි විකෘති කර තිබුණේ රෝහණ බැද්දගේ මහතා විසින් ගායනා කර, සහන් රන්වල මහතාගේ තනු නිර්මාණයෙන්, ගීත් තරංග මහතාගේ ගී පද රචනයෙන් මෙන්ම සදීප්ත ගුණවර්ධන මහතාගේ සංගීත සංයෝජනයෙන් රන්වළ බළකායේ දායකත්වයෙන් නිර්මාණය වූ ‘තුන් හෙළේ හැඩ’ ගීතයයි.

    ‘තුන් හෙළේ හැඩ..’ මුල් ගීතය පහතින් දැක්වේ.

    ජල ටැංකියෙන් ආ මාරයා දැරිවියක් බිලිගනී

    0

    නිවසක වැසිකිලි වහලයක් මත රදවා තිබුණු ලීටර් 500 ප්ලාස්ටික් ජල ටැංකියක් අසල කරාමයකින් දිය නාමින් සිටි අවුරුදු 03යි මාස 07ක් වයසැති දැරිවියක් එම ටැංකිය ඇග මතට වැටීමෙන් මියගොස් ඇත.

    අරලගංවිල රුහුණුගම කජුවත්තේ පදිංචිව සිටි රශ්මි දෙව්මිණි නැමැති මෙම දැරිවිය මෙම අනතුරට ලක්ව ඇත්තේ ඊයේ සවස් කාලයේදීය.

    අරලගංවිල රෝහලට ඇතුලත්කර ප්‍රතිකාර ලබමින් සිටියදී ඇය මියගොස් ඇති බව පොලීසිය කියයි.

    Photo -File Photo

    උපත් පාලන කොපුවල කොකේන් පුරවා ගිලගෙන ආ විදෙස් කත කොටුවේ

    0

    උපත් පාලන කොපු අතර බහා එම කොපු ගිල උදරයේ සඟවාගෙන කොකේන් තොගයක් මෙරටට රැගෙන ආ මැඩගස්කර ජාතික කතක් පොලිස් මත්ද්‍රව්‍ය කාර්යාංශයේ ගුවන්තොටුපොල ඒකකයේ නිලධාරීන් විසින් අත්අඩංගුවට ගෙන ඇත.

    මෙම කත පසුගිය 12 වෙනිදා මෙරටට පැමිණීමේදී ගුවන්තොටුපොලේදී කළ ස්කෑන් පරීක්ෂාවේදී උදරය තුළ යමක් සඟවාගෙන පැමිණ ඇති බව පෙනී ගොස් තිබේ. ඒ අනුව ඇයව රදවාගෙන කළ පරීක්ෂාවේදී අනාවරණය වී ඇත්තේ උදරය තුළ කොකේන් ගුලි 57ක් ඇති බවය.

    ඇයව මීගමුව රෝහලට ඇතුලත්කිරීමෙන් පසු අද උදෑසන වන විට ගිල තිබුණු කොකේන් ගුලි සියල්ල පිටතට ගෙන ඇති අතර එම කොකේන්වල බර ග්‍රෑම් 620ක් බව පොලිස් මත්ද්‍රව්‍ය කාර්යාංශය සඳහන් කළේය.

    සංගීතයක් බලන්න ගොස් කාන්තාවකට පහරදුන් කොස්තාපල්ට වූ දේ..

    0

    කාන්තාවකට පහරදීමක් සම්බන්ධයෙන් අත්අඩංගුවට ගත් පොලිස් නිලධාරියෙක් අධිකරණයට ඉදිරිපත් කිරීමෙන් අනතුරුව ලබන 22 දා දක්වා රක්ෂිත බන්ධනාගාරගතකර ඇත.

    මෙසේ රක්ෂිත බන්ධනාගාරගත කරඇත්තේ තිරප්පනේ පොලිස් ස්ථානයට අනුයුක්තව සේවයේ නිරතව සිටින පොලිස් කොස්තාපල්වරයෙකි.

    මෙම කොස්තාපල්වරයා පසුගිය 10 වෙනිදා රාජකාරි විවේකය වාර්තාකර සිටියදී සහෝදරයා සමඟ නිවසින් පිටව ගොස් ඇත්තේ සංගීත සංදර්ශනයක් නැරඹිමටය.

    එහිදී ඇතිවූ ආරවුලක් දුරදිග ගොස් නිවසකට කඩාවැදී කාන්තාවකට පහරදී ඇති බව කපුගොල්ලෑව පොලීසිය සඳහන් කළේය.

    මෙම පහරදීමෙන් තුවාල ලැබූ කාන්තාව අනුරාධපුර රෝහලට ඇතුලත්කර ඇත. තමාටද පහරදුන් බව කියමින් පොලිස් නිලධාරියාද අනුරාධපුර රෝහලට ඇතුලත්කර තිබේ.

    මේ සම්බන්ධයෙන් පොලිස් නිලධාරයාව අත්අඩංගුවට ගෙන ඇත්තේ ඊයේ දිනයේ දී බව පොලීසිය කියයි.

    පැරණි අමනාපකම් අලුත් වී 4ක් මරුදකී

    0
    fresh crime scene at night

    පැරණි අමනාපකම් මුල්කරගෙන පරණ අවුරුද්දේ ඇතිවුණු ගැටුම්වලින් ඊයේ දිනය තුළ පමණක් පුද්ගලයින් සිව් දෙනෙක් ඝාතනය වී තිබේ.

    කුඩා ඔය, බලංගොඩ, මාතලේ සහ හුංගම යන ප්‍රදේශවලදී මෙම ඝාතන සිදුව ඇත.

    මේ අතරින් කුඩාඔයදී ඝාතනය වන්නේ වෙහෙරයායේ පදිංචිකරුවෙක් වන එම්. ප්‍රියන්ත කුමාර නැමැති 44 හැවිරිදි වියේ පසුවන්නෙකි. පහරදීමකින් සිදුවූ එම ඝාතනය සම්බන්දයෙන් අත්අඩංගුවට ගෙන ඇත්තේ එම ප්‍රදේශයේම පදිංචිකරුවෙක් වන හිච්චි වසන්ත නැමැති අයයි. එම සැකකරු සහ ඝාතනය වූ පුද්ගලයා මස්සිනාලාය. පොලිසිය පවසන්නේ ඝාතනයට ලක්ව ඇත්තේ සැකකරුගේ බිරිඳගේ සහෝදරයා බවය. අතින් පයින් කළ පහරදීමකින් මෙම ඝාතනය වී ඇත.

    බලංගොඩ ඝාතනය වී ඇත්තේ පෙට්ටිගලවත්තේ පදිංචිකරුවෙකි. නන්ද ක්‍රීෂ්නන් නැමැති 32 හැවිරිදි වියේ පසුවන ඔහු වෘත්තියෙන් ත්‍රීරෝද රථ රියදුරෙකි. ගෙල කපා මෙම ඝාතනය සිදුකර ඇත.

    මාතලේදී සහෝදරයින් දෙදෙනෙක් අතර ඇතිවූ ගැටුමක් දුරදිග යමින් එක් සහෝදරයෙක් විසින් අනිත් සහෝදරයාට පිහියකින් පහරදී ඝාතනයකර තිබේ. දෙදෙනා එක්ව මත්පැන් පානය කිරීමෙන් අනතුරුව මෙම ඝාතනය වී ඇත.

    ඝාතනය වී ඇත්තේ එල්. ක්‍රීෂාන් නැමැති 27 හැවිරිදි වියේ පසුවූවෙක් වන අතර සැකපිට ඔහුගේ 34 හැවිරිදි සහෝදරයා අත්අඩංගුවට ගෙන තිබේ.

    හුංගම ඝාතනය වී ඇත්තේ රන්ත වාඩිගලදීය. අවුරුදු 26ක් වන එච්.එස්. දිල්ශාන් නැමැති අයෙක් මෛසේ ඝාතනය වී ඇත. මෙම ඝාතනය සම්බන්ධයෙන් පොලීසිය එම ප්‍රදේශයේම පපදිංචිකරුවෙක් අත්අඩංගුවට ගෙන ඇත.

    අමෙරිකානු ජනපතිගෙන් ලාංකිකයන්ට අවුරුදු සුබපැතුම්

    0
    Joe biden

    සිංහල දෙමළ අලුත් අවුරුද්ද සමරන ශ්‍රී ලාංකිකයන් වෙත අමෙරිකානු ජනාධිපති ජෝ බයිඩෙන් සිය සුබපැතුම් එක්කර තිබේ.

    සිය සමාජ ජාලයේ සටහනක් තබමින් හෙතෙම සුබපැතුම් එක්කර තිබුණේ මෙසේ ය.

    රටටම සෞභාග්‍ය පතමින් ශ්‍රී දළදා මාළිගාවේ කිරි ඉතිරේ

    0

    (නදීක දයා බණ්ඩාර – මහනුවර)

    සිංහල හින්දු අලුත් අවුරුදු උදාව සනිටුහන් කරමින් ශ්‍රී දළදා මාලිගාවේ කිරි ඉතිරවීම ඊයේ රාත්‍රී යෙදුණු සුබ මොහොතින් සිදුවිය.

    අලුත් අවුරුදු උදාව යෙදුණු රාත්‍රී 09.05ට දකුණු දිශාව බලා කිරි ඉතිරවීම දියවඩන නිලමේ ප්‍රදීප් නිලංග දෑල මහතාගේ ප්‍රධානත්වයෙන් සිදු කෙරිණි.

    නව වසරක උදාවේ මුලින්ම කිරි ඉතිරවීම ශ්‍රී දළදා මාලිගාවේදී සිදුකිරීම පුරාතනයේ සිට සිදුවූ චාරිත්‍රයකි. ඒ අනුව අලුත් අවුරුදු උදාවන නැකතට කිරි ඉතිරවීම සම්ප්‍රදාය වේ.

    රටට සහ සමස්ථ මහජනයාට සුභසිද්ධිය ප්‍රාර්ථනා කරමින් ආගමිකවතාවත් පවත්වා සුභ මොහොතින් කිරි ඉතිරවීම සිදු කෙරේ.

    දන්ත ධාතූන් වහන්සේ උදෙසා තේවාව භාර මල්වතු මහ විහාර පාර්ශවයේ මහා සංඝරත්නය සහ රාජකාරී භාර කාර්යය මණ්ඩලය සහ සැදැහැවතුන් ද මෙම අවස්ථාවට එක්ව සිටියහ.

    මේ අලුත් අවුරුද්දේ හැමෝම බලාසිටි නැකත උදාවෙයි

    0

    උදාවූ සිංහල දෙමළ අලුත් අවුරුද්දේ වැඩ ඇල්ලීම, ගනුදෙනු කිරීම හා ආහාර අනුභව නැකත උදාවී තිබේ.

    අප්‍රේල් මස 13 වන සෙනසුරාදා එනම් අද මධ්‍යම රාත්‍රී 12.06 ට හෙවත් අප්‍රියෙල් 14 ඉරිදාට එළිවන පාන්දර 00.06 ට නීල වර්ණ වස්ත්‍රාභරණයෙන් සැරසී දකුණු දිශාව බලා සියලු වැඩ අල්ලා ගනුදෙනු කොට ආහාර අනුභව කිරීම මැනවි යැයි නැකැත් සීට්ටුවේ සඳහන් වේ.

    ආහාර පිසීමේ නැකත උදාවෙයි

    0

    සිංහල දෙමළ අලුත් අවුරුද්දේ ආහාර පිසීමේ නැකත දැන් උදාවී තිබේ.

    අප්‍රේල් මස 13 වන සෙනසුරාදා එනම් අද රාත්‍රී 11.06 ට නීල වර්ණ වස්ත්‍රාභරණයෙන් සැරසී දකුණු දිශාව බලා ලිප් බැඳ ගිනිමොළවා තල උක් හකුරු මිශ්‍ර කිරිබතක් ද තල මිශ්‍ර කැවිලි වර්ගයක් ද පිළියෙල කරගැනීම මැනවි යනුවෙන් නැකැත් සීට්ටුවේ සඳහන් වේ.

     

     

    “අන්ධකාර යුගය නිමාකර සෞභාග්‍යවත් යුගයක් උදාකිරීමට පෙළ ගැසෙමු!”

    0

    උදාවූ සිංහල දෙමළ අලුත් අවුරුද්ද නිමිත්තෙන් විපක්ෂ නායක සජිත් ප්‍රේමදාස මහතා දෙස් විදෙස්හි ජීවත්වන ශ්‍රී ලාංකිකයන් වෙත සුබපැතුම් එක්කර තිබේ.

    විපක්ෂනායකවරයා නිකුත් කළ සුබපැතුම් පණිවිඩය මෙසේ ය.

    “සූර්යා මීන රාශියෙන් මේෂ රාශියට සංක්‍රමණය වීමත් සමඟ උදාවන සිංහල හා දෙමළ අලුත් අවුරුද්ද ලෝකවාසී මෙන් ම ලක්වාසී සිංහල සහ දෙමළ ජනතාව ඉතාමත් ප්‍රීතියෙන් සමරණ උත්සව අවස්ථාවක් ලෙස හැඳින්විය හැකි ය. හෙළයේ මහා සංස්කෘතික මංගල්‍යය ලෙස හැඳින්වෙන මෙදින සියලුම දෙනා එකම නැකැතක සිට එකම කාර්යයක නියැලෙන අතර මෙකී චාරිත්‍රය නිසාම ලෝකයේ සෙසු රටවල් අතර සිංහල හා දෙමළ අලුත් අවුරුද්ද ඉතා ප්‍රචලිතව තිබේ.

    සියලුම ජනතාව මෙදින තමන්ට හැකි උපරිම අයුරින් මෙකී චාරිත්‍ර ඉටු කරන්නේ ඉදිරි වසරේ සෞභාග්‍යය සහ සශ්‍රීකත්වය අපේක්ෂාවෙනි. නමුත් පසුගිය කාල වකවානුව ලක්වාසී ජනතාවට එතරම් හොඳ කාල වකවානුවක් නොවූ බව මා විශ්වාස කරමි. බදු බර වැඩි වීම, බඩු මිල ඉහළ යාම රටේ අභ්‍යන්තර අර්බුධ ආදී ගැටලු රාශියකට රට මුහුණ දුන් අතර මේ වන විට මැතිවරණ වසරක් ද උදා වී තිබේ. මේ වසරේ ජනතාව අපේක්ෂා කරන පාලනයක් රට තුළ බිහි වී නැවතත් අප මාතෘභූමියට සෞභාග්‍යය උදා වනු ඇති බව මාගේ විශ්වාසය යි.

    එසේ ම පවතින බංකොලොත්භාවයෙන් මිදී නැවතත් ස්වයංපෝෂිත ආර්ථික රටාවක් සහිත රටක් ලෙස අප රට පත් කර සාමය, සතුට, සැනසීම සහිත අභිමානවත් දේශයක් බිහි කිරීමට සැවොම එකා මෙන් අත්වැල් බැඳ ගැනීමට ද කාලය එළැඹ තිබේ.

    රට තුළ පවතින නව සාමාන්‍යකරණය අවසන් කර පෙර පැවැති ජීවන තත්ත්වයට රට ගෙන යාමේ දැවැන්ත අභියෝගයක් අප සතුව පවතී. ඒ අභියෝගය ජය ගත හැක්කේ ලක්ෂ 220ක් වූ ජනතාව එකා මෙන් කටයුතු කිරීමෙනි. සෑම අඳුරු වළාවකම රිදී රේඛාවක් දැකිය හැක්කා සේ මේ අන්ධකාර යුගය අවසන් කර වචනයේ පරිසමාප්ත අර්ථයෙන්ම සෞභාග්‍ය සම්පන්න යුගයක් උදාකිරීම සඳහා අප පෙළ ගැසෙමු.”

    “නවමු සංකල්පවලින් පෝෂිත අලුත් අවුරුද්දක් අදින් අරඹමු!”

    0

    නවමු සංකල්පයන් තුළින් පෝෂිත අලුත් අවුරුද්දක් අදින් ඇරඹීමට සියලු දෙනා එක්ව කටයුතු කරමු යැයි අග්‍රාමාත්‍ය දිනේෂ් ගුණවර්ධන මහතා පවසයි.

    උදාවූ සිංහල දෙමළ අලුත් අවුරුද්ද නිමිත්තෙන් සමස්ත ශ්‍රී ලාංකිකයන් වෙත සිය සුබපැතුම් එක්කරමින් අග්‍රාමාත්‍යවරයා මේ බව පැවසීය.

    අග්‍රාමාත්‍යවරයා විසින් ජනතාව වෙත නිකුත් කළ සුබපැතුම් පණිවිඩය පහතින්.

    “සිංහල හා හින්දු අලූත් අවුරුද්ද හෙවත් සූර්ය මංගල්‍යය හෙළයේ මහා සංස්කෘතික මංගල්‍යයයි.

    මෙලෙස නැකත් චාරිත‍්‍රයන්ට හා ආගමික කටයුතුවලට මූලිකත්වය දෙමින්, පාරම්පරික සම්ප‍්‍රදායන් හා සිරිත් සුරකිමින් එකම අරමුණකින් යුතුව, එකම මොහොතක එකම නැකතකට එක්ව කටයුතු කිරීම ලොව කිසිදු රටක සංස්කෘතියක දක්නට නොලැබේ.

    ස්වභාවධර්මයා සමග ගනුදෙනු කළ අපේ මුතුන් මිත්තෝ අලුත් අවුරුද්දේ එය තව තවත් යථාවත් කළෝය. ඔවුන්ගේ දරු මුණුපුරන් වූ අපට ආහාර සුරක්ෂිතතාවය, සකසුරුවම, අපේකම, සමගිය පිළිබඳව යළි යළි අකුරු කරන්නට අවශ්‍ය නොවේ. අවශ්‍ය ක්‍රියත්මකභාවයයි.

    ආහාර හා ආර්ථික අර්බුදයකට මුහුණ දී, රට බත බුලතින් සරි කරන්නට අභියෝගාත්මකව ගොවි ජනතාව කළ මෙහෙය මේ අලුත් අවුරුද්දේ කෘතවේදීව සිහිපත් කළ යුතුයි.පසුගිය වකවානුව අපට හිතන්නට බොහෝ දේ ඉතිරි කොට ඇත. මේසා රෝග ව්‍යසන, ආර්ථික හා සමාජයීය අර්බුද මෑත ඉතිහාසයේ අප නුදුටුවෙමු. ඒවා යළිදු නොදකින්නට, මතු පරපුරට ඒවා ඉතිරි නොකරන්නට නවමු සංකල්පයන් තුළින් පෝෂිත අලුත් අවුරුද්දක් අදින් අරඹමු.”

    “සමාජ සබඳතාවෙන් හා සාමුහිකත්වයෙන් අලුත් අවුරුද්දේ අලුත් වෙමු”

    0

    උදාවූ සිංහල දෙමළ අලුත් අවුරුද්ද වෙනුවෙන් ජනාධිපති රනිල් වික්‍රමසිංහ මහතා ජනතාවට සිය සුබපැතුම් එක්කර තිබේ.

    ජනාධිපතිවරයාගේ සුබපැතුම් පණිවිඩය පහතින්.

    “අලුත්වීම ජීවිතයට අලුත් බලාපොරොත්තු එක් කරයි.

    ජාතියක්, දේශයක්, ලෝකයක් ඉදිරියට යන්නේ අලුත් වීමෙනි. අලුත් අලුත් සිතිවිලි ඔස්සේ අලුත් අලුත් දෑ නිර්මාණය කරලීමෙනි.

    සාම්ප්‍රදායික අවුරුද්දට අලුත් වීම, කැලැන්ඩර අවුරුද්දට අලුත් වීම, සෘතුවෙන් සෘතුවට අලුත් වීම ආදී වශයෙන් ලෝකයේ රටවල ජනතාව ඔවුනට ලැබී ඇති අවස්ථාවන්හි අලුත් වෙති.

    මේ හැම අලුත්වීමක් පසුපසම තවත් අතිශය වැදගත් කාරණයක් වෙයි. ඒ සමාජ සබඳතාවය සහ සාමුහිකත්වය යි.

    සිංහල සහ දෙමළ අලුත් අවුරුද්දේ අප අලුත් වන්නේ ද සබඳතාවය සහ සාමුහිකත්වය කේන්ද්‍ර කොටගෙනය. ලෝකයේ ඕනෑම රටක සාම්ප්‍රදායික අවුරුදු චාරිත්‍රයන් සැකසී ඇත්තේ මේ කරුණු පදනම් කරගෙනය.

    අලුත් අවුරුද්ද අපට පෙන්වා දෙන මේ වැදගත් කරුණ පිළිබඳව මේ අවස්ථාවේ අවධාරණය කිරීම වඩාත් සුදුසු යැයි සිතමි.

    අලුත් අවුරුද්දේ අලුත් වීමට මතු නොව, රටක් වශයෙන් නිවැරදි මගක ඉදිරියට යන්නට ද අවශ්‍ය මූලික සාධකයක් වනුයේ සමාජ සබඳතාවන් හා සාමුහිකත්වය යි.

    ඒ වගත් සිහිපත් කරමින් ඔබට සුබ අලුත් අවුරුද්දක් වේවා යැයි ප්‍රාර්ථනා කරමි.”

    සුබ අලුත් අවුරුද්දක් වේවා!

    0

    2024 සිංහල දෙමළ අලුත් අවුරුද්ද උදාවෙයි.

    අද දින එනම් අප්‍රේල් මස 13 වන සෙනසුරාදා දින අපරභාග 09.05 ට සිංහල අලුත් අවුරුදු උදාව සිදුවන බව රාජ්‍ය නැකැත් කමිටුවේ නැකැත් සීට්ටුුවේ සඳහන් වෙයි.

    උදාවූ සිංහල දෙමළ අලුත් අවුරුද්ද ලොව පුරා වෙසෙන මුළුමහත් ශ්‍රී ලාංකිකයින්ට සාමයෙන් පිරි, නීරෝගී සුබ අලුත් අවුරුද්දක් වේවා යැයි නිව්ස්වේව් අප කාර්යමණ්ඩලයෙන් සුබපැතුම්!!!

    මීළඟට යෙදෙන නැකැත් චාරිත්‍ර පහතින් දැක්වේ.

     

     

    ලංකාවේ රුපියල ලෝක වාර්තාවක

    0

    ලෝකයේ නැගී එන වෙළෙඳපොළ අතුරීන් ඉහලම කාර්ය සාධනය පෙන්වූ මුදල් ඒකකය බවට ශ්‍රී ලංකා රුපියල 2024 වසරේ පළමු කාර්තුවේ දී පත්වී තිබේ.

    බ්ලූම්බර්ග් වෙළඳපොළ දත්ත උපුටා දක්වමින් ජනාධිපති මාධ්‍ය අංශය මේ බව නිවේදනය කළේය.

    Bloomberg ආයතනය, ජාත්‍යන්තර වශයෙන් ව්‍යාපාර සහ වෙළඳපල ප්‍රවෘත්ති, දත්ත, විශ්ලේෂණය සහ වීඩියෝ ලොවට ලබා දෙයි.

    එහි දත්ත විශ්ලේෂණයට අනුව මේ වසර ආරම්භයේදී පැවති අගයට සාපේක්ෂව ශ්‍රී ලංකා රුපියල 7%කට වඩා වැඩි කැපී පෙනෙන වර්ධනයක් පෙන්නුම් කර ඇත.

    පුණ්‍ය කාලය උදාවෙයි

    0

    සිංහල දෙමළ අලුත් අවුරුද්දේ පුණ්‍ය කාලය දැන් උදාවෙයි.

    ඒ අනුව අප්‍රේල් මස 13 වන සෙනසුරාදා එනම් අද දින අපරභාග 2.41 සිට හෙට(14) ඉරිදා දින අලුයම් 3.29 දක්වා පුණ්‍ය කාලය යෙදී ඇත.

    ඒ අනුව අද දින එනම් අප්‍රේල් මස 13 වන සෙනසුරාදා අපරභාග 2.41 ට පළමුව ආහාරපාන ගෙන සියලු වැඩ අත්හැර ආගමික වතාවත්වල යෙදීම ද, පුණ්‍ය කාලයේ අපර කොටස එනම්, අප්‍රේල් මස 13 වන සෙනසුරාදා අපරභාග 9.05 සිට 14 වන ඉරිදා අලුයම 3.29 දක්වා පහත දැක්වෙන අයුරින් ආහාර පිසීම, වැඩ ඇල්ලීම, ගනුදෙනු කිරීම හා ආහාර අනුභවය ආදී නැකැත් චාරිත්‍ර විධි ඉටුකිරීම මැනවි යනුවෙන් අලුත් අවුරුදු නැකැත් සීට්ටුවේ සඳහන් වේ.

     

    උණබම්බු වෙඩිල්ල පුපුරාගොස් දරුවකු මරුට

    0

    උණබම්බු වෙඩි පත්තුකරමින් සිටියදී එය පුපුරාගොස් 11 හැවිරිදි දරුවෙකු පිළිස්සී තුවාල ලබා පේරාදෙණිය රෝහලේ ප්‍රතිකාර ලබමින් සිටියදී ඊයේ මියගොස් ඇත.

    මෙසේ මියගොස් ඇත්තේ වැල්ලව පොලිස් වසමේ කඹගල්ල , බොඩි හංදියේ පදිංචිව සිටි එම්.පී.ඩී.එන්. යෙහාන් දරුවාය. .

    11 හැවිරිදි වියේ පසුවූ මෙම දරුවා සිය වැඩිමහල් සහෝදරයා සහ මිතුරන් කිහිප දෙනෙකු සමඟ එක්ව අලුත් අවුරුද්ද වෙනුවෙන් පසුගිය 08 වෙනිදා උණබම්බු වෙඩි පත්තුකරමින් සිටියදී එය පුපුරාගොස් තුවාල ලබා ඇත.

    කුරුණෑගල රෝහලට ඇතුලත් කිරීමෙන් අනතුරුව මෙම දරුවා පේරාදෙණිය රෝහලට මාරුකර යවා ඇත. බරපතල තත්ත්වයේ සිටි දරුවා ඊයේ සවස මියගොස් තිබේ.

    අවුරුදු උත්සව, සංගීත සංදර්ශන, සැණකෙළි 4500කට පොලිස් ඇස

    0

    මෙවර අලුත් අවුරුද්ද වෙනුවෙන් දිවයින පුරා අවුරුදු උත්සව, සංගීත සංදර්ශන, සැණකෙලි හා වෙනත් උත්සව 4500කට වැඩි ප්‍රමාණයක් ක්‍රියාත්මක බව පොලිස් මූලස්ථානය සඳහන් කරයි.

    ජනතාව වැඩි වශයෙන් ඒකරාශීවන මේ සෑම ස්ථානයකම ආරක්ෂාව වෙනුවෙන් පොලිස් නිලධාරීන් 14,000ක්, පොලිස් විශේෂ කාර්ය බලකායේ 500ක්, ත්‍රීවිධ හමුදාවේ 400ක් සහ සිවිල් ආරක්ෂක කමිටු සාමාජිකයන් 15,806ක් යෙදවෙන බව පොලිස් මාධ්‍ය ප්‍රකාශක කාර්යාලය සඳහන් කළේය.

    මේ සම්බන්ධයෙන් පොලිස්පති දේශබන්දු තෙන්නකෝන් මහතා පළාත් භාර ජෙයෂ්ඨ නියෝජ්‍ය පොලිස්පතිවරුන්ට විශේෂ අවධානයට යොමුකර ඇති බව ද පොලිස් මාධ්‍ය ප්‍රකාාශක කාර්යාලය සඳහන් කළේය.

    අලුත් අවුරුද්දට රටපුරා බෙදන්න හොර නෝට්ටු ගැසූ තැනක්

    0

    අලුත් අවුරුද්දේ බෙදා හැරීම සඳහා ව්‍යාජ ලෙස මුදල් නෝට්ටු මුද්‍රණය කළ ස්ථානයක් ගාල්ල කොට්ඨාශ අපරාධ විමර්ශන කාර්යාංශයේ නිලධාරීන් වටලා ව්‍යාජ ලෙස මුද්‍රණය කළ නෝට්ටු ඇතුළු මුද්‍රණ උපකරණ සමඟ නෝට්ටු මුද්‍රණය කළ පුදගලයාව අත්අඩංගුවට ගෙන ඇත.

    මෙම ව්‍යාජ මුදල් නෝට්ටු මුද්‍රණය කළ ස්ථානය පිහිටා තිබීතේ අහංගම, ඉමදූව පාරේ, ශ්‍රමදාන මාවතේය.

    පොලීසිය ඊයේ මෙම ස්ථානය වටලා ඇත්තේ භයේ දිනයේදීය. මෙම ස්ථානයේ මුදල් නෝට්ටු මුද්‍රණය කිරීමට අමතරව විදෙස් ගමන් බලපත්‍රවල ඇතැම් කොටස්ද මුද්‍රණය කරන බවට සැකකරන තොරතුරු ලැබී ඇත. එහි තිබී විවිධ පුද්ගලයින්ට අයත් විදෙස්ගමන් බලපත්‍ර 100ක්ද හමුවී ඇත.

    පරීක්ෂා කිරීමේදී පෙනී ගොස් ඇත්තේ රුපියල් 1000, 5000, සහ 500 නෝට්ටු මෙහි මුද්‍රණයකර ඇති බවය. එම නෝට්ටු මුද්‍රණය කිරීමට යොදාගත් ලැප්ටොප් යන්ත්‍රයක් සහ මුද්‍රණ යන්ත්‍රයක්ද පොලීසියට හමුවී ඇත. එසේම මෙම නෝට්ටු මුද්‍රණයට යොදාගත් කඩදාසි තොගයක්ද සොයාගත් බව පොලීසිය කියයි.

    අත්අඩංගුවටගත් සැකකරු 47 හැවිරිදි වියේ පසුවන ශ්‍රමදාන මාවතේ පදිංචිකරුවෙකි. ඔහු රැකියාව ලෙස සිදුකරනු ලබන්නේ වෙළඳ සහයකයෙකු ලෙස කටයුතු කිරීම බව පොලීසිය කියයි.

    පුණ්‍ය කාලයේ පන්සල් -කෝවිල් යද්දී වහින්න පුළුවන්

    0

    සිංහල දෙමළ අලුත් අවුරුද්ද උදාවන අද දිනයේත් පස්වරුවේ වැසි සහිත කාලගුණයක් අතරතුර පුණ්‍ය කාලය යෙදෙන බවට, නවතම කාලගුණ අනාවැකියෙන් පෙනී යයි.

    හෙට දිනට ද අදාළ වන පරිදි අද(13) දින මධ්‍යහන 12.00 ට නිකුත්කරන ලද අනාවැකියෙන් ප්‍රකාශ කර ඇත්තේ බස්නාහිර, සබරගමුව, දකුණු, මධ්‍යම, වයඹ සහ ඌව පළාත්වල ප.ව. 2.00 න් පමණ පසු තැනින් තැන වැසි හෝ ගිගුරුම් සහිත වැසි ඇති වන බවයි.

    දිවයිනේ සෙසු ප්‍රදේශවල සිහින් වැසි වාර කිහිපයක් ඇතිවිය හැක.

    බස්නාහිර, සබරගමුව සහ දකුණු පළාත්වල ඇතැම් ස්ථානවල මි.මී. 75 පමණ තරමක තද වැසි ඇතිවිය හැක.

    බස්නාහිර, මධ්‍යම, සබරගමුව සහ ඌව පළාත්වලත් ගාල්ල සහ මාතර දිස්ත්‍රික්කවලත් ඇතැම් ස්ථානවල උදෑසන කාලයේදී මීදුම් සහිත තත්ත්වයක් පැවතිය හැක.

    ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් කාරුණිකව ඉල්ලා සිටිනු ලැබේ.

    දෘශ්‍ය ලෙස සූර්යයා උතුරට ගමන් කිරීමේදී සූර්යයා, අප්‍රේල් මස 05 සිට 15 දක්වා දිනවලදී ශ්‍රී ලංකාව ආශ්‍රිත අක්ෂාංශ වලට සෘජුවම ඉහලින් පවතී. හෙට දින (14) දහවල් 12:10 ට නයිනතිව්, පුන්කුඩුතිව්, මණ්ඩයිතිව්, මනල්කාඩු සහ උඩුතුරෙයි යන ප්‍රදේශවලට හිරු මුදුන් වනු ඇත.

    කාන්තාවක් හොර නෝට්ටුවකින් බයික් එකට තෙල් ගහලා

    0

    ව්‍යාජ ලෙස මුද්‍රණය කළ රුපියල් 5,000 නෝට්ටුවක් ලබාදී යතුරුපැදියකට ඉන්ධන ලබාගත් කාන්තාවක් දිවුලපිටිය පොලීසිය ඊයේ අත්අඩංගුවට ගෙන ඇත.

    මෙසේ අත්අඩංගුවට ගෙන ඇත්තේ දූනගහ, පැලවත්තේ පදිංචිකරියක් වන 44 හැවිරිදි කාන්තාවකි.

    ඇය ව්‍යාපාරිකාවක් වන අතර ඇය ඉන්ධන ලබාගෙන ඇත්තේ දූනගහ නගරයේ පිහිටි ඉන්ධන පිරවුම්හලකිනි. ඇයට මෙම ව්‍යාජ නෝට්ටුව ලද ආකාරය ගැන විමර්ශන පැවැත්වෙන බව පොලීසිය කියයි.